شعبان ضد الأدمان!

افتح التليفزيون.. قلب في القنوات.. فوّت دي، واللي بعدها كمان..
أيوه استنى هنا بقى..
مين ده يا سيدي؟
ده "شعبان عبد الرحيم"!!!

استنى كده.. ركّز شوية في الصورة كده...
سيبك من الهدوم المزركشة اللي هو لابسها دي.. يعني مش جديدة عليه..

بس خدت بالك؟..
دي الخلفية بتاعة الأغنية البوستر بتاع حملة "حماية" لمحاربة الإدمان اللي "عمرو خالد" بينظمها..!

غريبة دي قوي!!..
إيه اللي جاب "شعبولا" لـ" عمرو خالد" لمحاربة الإدمان!
هو ينفع أصلا نحط ده جنب ده عشان نحارب ده؟

طب تعالَ نسمع كده بيغني إيه:

"ياللي انت ماشي ومخدّر
لازم تفكر وتقدّر..
نصيحة مني لوجه الله..
بلاش تقاوح وتصدر..
أنا عمرو خالد وصاني..
وقال كلام أنا بكاني..
وقال لي غنِّي لأهل الخير
يمكن يتوبوا من تاني
بعت وقال لي يا شعبان..
أنا عامل حملة على الإدمان..
عايزين نساعد بعضينا
ونوعي شبابنا في كل مكان...
اسمع مني وركز لي..
وكل واحد يجهز لي..
ع الترامادول أنا هأتكلم..
وياريت ما حدش يغمز لي.."

شوف الكليب على اليو تيوب

إيه رأيك..
تنفع؟ تمشي يعني؟
الكلام دمه خفيف وما قالش فيه لأول مرة "هيييييييييييه"، وعاوز يقول حاجة..

بس هل أنت متخيل فعلا إنه ممكن يقول حاجة؟
ولا الحكمة والموعظة لما تطلع من "شعبان" يبقى قول عليها السلام؟

فيه ناس شايفة العكس بالمناسبة..
ورأيهم إن شعبان مش بيخاطب "نادر" و"هيثم" و"تامر"، ولا اللي ساكنين فيه مصر الجديدة أو المهندسين، أو اللي بيلعبوا فروسية في نادي الجزيرة..

"شعبان" رايح وموجه لـ"سيد شكمان" و"أنور بقو" و"زكي حنتيرة" و"فزدق أبو دومة".. الناس المصريين العاديين اللي ممكن يكونوا مدمنين في الأحياء والقرى الشعبية، ولا ليهم علاقة لا بأغاني "الراب" أو "عمرو مصطفى"..

أيوه ما حملة "حماية" عملت جنب أغنية "شعبان عبد الرحيم" أغنيتين تانيين بس بيخاطبوا بقى شريحة تانية برضه..
في أغنية "راب".. بيقول فيها المغني:

"تعالوا احكيلكوا حكاية
تلاتة في لحظة ضعف
وقعوا في مصيدة الإدمان
وفي لحظة فاقوا ورجعوا زي زمان
أول واحد كان موهوب محبوب ذو التزام..
طموح بيبتدئ حياته وعنده أحلام
لسه متخرج وكله تمام
بس حس بالتشاؤم على مدى الأيام..
عشر شهور ما فيش شغل ما فيش
واسطة...."

أما "عمرو مصطفى" الملحن والمغني المشهور، فغنى هو كمان ضد الإدمان وقال:

"أنا مش ضعيف ولا هاستسلم..
م اللي جرا لي انا هأتعلم..
بينا إيد في إيد ومن جديد
نبدأ ونرضي ربنا..
نفْضل شباب في الخير
صحاب نمشي في طريق باين لنا..
طول ما ربنا ويايا
حواليا ناس بتشجعني
هاتغير أنا من جوايا
عمر الشيطان ما هيخدعني"

يعني.. إنت رأيك إيه؟

شايف أن تنوع وتباين الوسائط والشخصيات اللي بتدعوك للمشاركة في الحملة دي أو أي حملة تانية زيها.. كويس ومفيد وبيحقق هدفه؟ وأنه لازم نخاطب كل طبقة بالطريقة اللي تستوعبها كويس؟

ولا أنت شايف أن ده ما ينفعش أصلا... لأن لكل مقام مقال.. وما ينفعش "شعبان عبد الرحيم" يغني عن مقاومة الإدمان، وهو بيغني بطريقته الغريبة دي؟

وهل لو ظهر "شعبان عبد الرحيم" أو غيره وهم بيدعوك لحملات مماثلة.. إيه الانطباع اللي هيتكون عندك؟

تقبل.. ولا ترفض.. ولا بين بين.. وإيه السبب؟