ممكن رأيكم

بالنسبة لي انا شايف الموضوع من جهة تانيه
المدخن قبل ما يدخن بيكون عارف ان التدخين مضر بالصحه وان الي بيدخن وحش وبيضر نفسه وكل الكلام ده
وبالتالي لو قلنا ان الي بيدخن ده مابيستفدش حاجه من التدخين غير انه بيضر نفسه
ده معناه ان كل الي بيدخنو دول مجانين لان مافيش حد عاقل حيضر نفسه من غير مقابل
وده كلام مش مظبوط
دلواتي خلينا ناخد المراحل بتاعت التدخين دي من اولها
معظم المدخنين بيبداو التدخين في سن مبكر
يعني ممكن يكون في المرحلة الثانويه او الجامعه في اول سنه بالذات واحيانا بيكون من المرحلة الاعداديه كمان
ولو بصينا في كل المراحل دي حنلاقي فيها ان الشخص بينتقل من مرحلة عمريه الى اخرى -من الطفولة الى الشباب-وفي الفتره دي الشخص بيكون مشوش الى حد كبير في افكاره وتصرفاته لانه بيحس انه كبر وعايز يحسس كل الي حوليه بده وفي نفس الوقت مش عارف يحدد ملامح شخصيته تكون ازاي, كل الي بيفكر فيه انه يعمل كل حاجه كان ممنوع منها وهو صغير, لذالك بيحاول معظم الشباب الابتعاد عن الاهل الي كانو بيمثلوله مرحلة الطفوله ويقرب اكثر لاصحابه الي بيمثلوله مرحلة الشباب
ومن هنا بيحاول الشخص ده انه يثبت نفسه في وصت اصحابه الجداد فيشوف الي بيعملوه ويحاول يندمج معاهم فيه ايا كان هذا الشئ (تدخين,معاكسة بنات,الشتيمه في الكلام,...) وطبعا الي بيخلي الجروب ده كله يعمل كده انهم عايزين يتغيرو 360 درجه عن حياتهم في الطفوله -ده عيب, ده حرام, كده كخ- وبكده بيكون اختار المدخن حياة الحريه والتغير على حساب صحته, يعني اختار بين حاجتين وشاف فين الحاجه الي حيستفيد منها اكتر -من وجهة نظره- وعملها مش انه بيضر نفسه وخلاص.
على فكره مش كل الشباب كده انا بس حبيت اتكلم عن نوعيه معينه من الشباب, ودي طبعا كلها حجات بترجع لعوامل نفسيه بتختلف من شاب لشاب اخر.
وانا الحمد لله مش مدخن ولا مشيش, عشان في ناس بتفتكر ان الشيشه مش تدخين
و ربنا يهدي الجميع!!